Spørsmål 30. januar: Kan de legge ut rapportane frå Norconsult AS (2016) og KS Konsulent (2021) og evt. andre rapportar og talgrunnlag som er tenkt brukt, på denne sida, så dei er lett tilgjengelege?

Svar: Hei og takk for e-post.  

Vi vil nytte prosjektsida til å legge ut rapportar og talgrunnlag som vert nytta i prosjektet undervegs.  

Rapporten til Norconsult  (2016) vil vi nytte delar av og det vert lagt ut på sida.  

Rapporten frå KS Konsulent har vi enno ikkje nytta som grunnlag, den vert ikkje lagt ut på nettsida. Legg den likevel med i svaret mitt til deg her.

---------------------------------------------

Skulebehovsplan frå Norconsult (2016) (PDF, 5 MB)

Spørsmål 15. februar: Kva er dei faktiske drifts- og lånekostnadane for dei ulike skulane i Ulstein kommune?

Svar: 

Hei.

 Vedlagt finn du driftskostnadar per skulebygg. Tala er for 2024 og er henta frå Ulstein kommune og UEKF. Tala frå begge selskapa er sett saman slik at dei viser eit samla bilete. Internhusleiga er fjerna. Den vert samla 0,- for begge selskap og er fjerna frå 2025.

Sjå vedlegg (XLSX, 15 kB)

Oppfølgingsspørsmål : Takk for tilsendte.  

Kan du også sende over avskrivingsgrunnlaget/restverdi/bokført verdi for kvart av bygga?

Svar: Hei.  

Kunnskapsgrunnlaget vert oppdatert med eit rekneark som viser funksjonane 202 grunnskule og 215 skulefritidsordning per skule. Vi kjem til å legge ut dette i løpet av kort tid.  

Eg legg ved fila her slik at du har den no. 

Vedlegg (XLSX, 35 kB)

Spørsmål 19. februar: Kven skal svare på spørjeundersøkelsen som skal gjennomførast i mars/april?

Svar: Hei.

Spørjeundersøkinga vert sendt til føresette som har barn eller elevar i barnehage og skule, tilsette i barnehage og skule og til elevar på 5.-10.klassesteg.  

Spørsmål 24. februar: I prognosen om elevtal kunne ein i staden for å skrive “Haddal skule held seg stabil med ein liten auke på 4 elevar (frå 2024/2025 til 2030/2031.)” skrive dette: “Haddal skule er den einaste skulen i kommunen som opplever positiv elevutvikling med ei auke på 14 % (7 elevar) fram til 2029, før det vert redusert med 3,6 % (2 elevar) i 2030.”

Svar: Hei og takk for e-post.

I rapporten legg vi vekt på å ordlegge oss nøytralt og faktabasert. Vi takkar for innspelet, men held oss til ordlyden som er valt.

Spørsmål: Kvifor blir ikkje Haddal nemnt med prosent ved auke i elevtalet? Alle andre skulane blir utrekna med prosent. Refererer til teksta som ligg under “kvifor vert det færre elevar”.

Svar: Hei og takk for spørsmålet.

Haddal skule var den einaste skulen som hadde positiv elevtalsutvikling, difor vart det ikkje rekna ut prosent. Dette skal vi endre på.  

Vi vil legge til prosent i teksten etter Haddal skule og supplere meir informasjon kring elev -og befolkningsframskrivingar på prosjektsida. 

Spørsmål 12. mars: Kva er lånesummen som er att for Haddal skule?

Svar: Hei og takk for e-post.  

Lånegjelda til kommune/kommunalt føretak er samla og ikkje delt opp etter bygg eller prosjekt. Vi har derfor ikkje oversikt over resterande lånesum per bygg eller prosjekt.  

Spørsmål 12. mars: Kva har Ulstein kommune/Haddal skule betalt i leige av bygg til UEKF per år? 

Svar: Hei.

Vedlagt finn du informasjon om husleige for skulane frå 2012 til 2024. UEKF vart regnskapsført etter rekneskapslova fram til 2012. Vi har lite informasjon om rekneskapen til UEKF frå før 2012.

Summen i oversikta er mangelfull då husleiga mellom kommunen og UEKF var sett opp som ein «symbolsk sum» som UEKF har fått for å dekkje sine kostandar, fordelt forhaldsmessig mellom bygga.

Vi veit ikkje kva grunnlaget for utrekning av husleigene var i si tid. Det var veldig mange år husleigene ikkje vart justert for pris-og lønsvekst mellom UK og UEKF. Om husleigene i si tid var berekna per bygg (som vi ikkje veit), kor mykje bemanning (reinhald, vaktmester, osb) var lagt til grunn, eller om det er blitt endra gjennom åra. Vi veit heller ikkje kva rentesats som var lagt til grunn på eventuelle kapitalkostnadar.  

Det betyr at vi veit for lite om husleigene på eldre bygg. Vi kan gi dykk informasjon om summen, men summen kan ikkje brukast til å vere noko indikasjon på kva Haddal skule kostar kommunen. Internhusleige blir eliminert/fjerna i rapportering til SSB, då det er dei direkte kostnadane/inntektene som viser kva eit bygg kostar å drifte.

Vedlegg (XLSX, 10 kB)

Spørsmål 14. mars: Eg lurer på kva de ønsker å finne ut av ved å halde denne spørjeundersøkinga. Dette synast eg kom dårlig fram. Her manglar spørsmål om det psykososiale skulemiljøet, trivsel og nærmiljøet til elevane. Dette er elementære ting i eit barn sitt liv. Vi må arbeide ut i frå barnets beste når vi ser på så store inngripen som endring av skulestruktur. Vidare synast eg spørsmålet angåande kor ofte vi brukar skulebygget hadde dårlige svaralternativ på, då vi i krinsane nærmast brukar dette bygget dagleg. Det er også noko som er veldig vesentlig når de ser på struktur og organisering.

Svar: Hei og takk for e-post.  

Kommunestyret har bede administrasjonen om å vurdere framtidig ressursbruk, struktur og kapasitet i barnehagar og skular i Ulstein kommune. Målet er å vurdere korleis oppvekstsektoren i Ulstein best kan verte organisert for å oppnå høg kvalitet, god ressursutnytting, nok kompetanse, godt læringsmiljø og utvikling i tråd med kommunale mål, samtidig som vi skal oppnå ei innsparing.   

I undersøkinga sendt ut til føresette er der spørsmål om ein opplever at barnet har gode venner på skulen og tre spørsmål knytt til bruk av skulebygg og uteområde etter skuletid. Svaralternativa på spørsmåla om kor ofte ein brukar skulebygget og uteområdet på fritida er rangert frå minst ein gong i veka, minst ein gong i månaden, sjeldnare enn ein gong i månaden eller aldri. Dersom ein får eit høgt score på minst ein gong i veka er det eit tydeleg signal på at det er høg aktivitet på skulebygget på fritida.   

Det skal sendast ut spørjeundersøking til elevar og tilsette, og vi kjem til å sjå på resultat frå elevundersøkinga som vart gjennomført i fjor. Samla sett håper vi på at vi får eit godt kunnskapsgrunnlag. 

Spørsmål 14. mars: Undrar på kva arbeidsgruppa ynskjer å finne ut av spørsmåla som blir stilt i spørjeundersøkinga. Det var ingen spørsmål om viktige ting som trivsel, det psykososiale skulemiljøet, vener, tryggleik, samarbeid mellom heim og skule, nærmiljø og fritidstilbod. Det burde også vore moglegheit til å kunne skrive kommentarar ved spørsmåla.

Svar: Hei og takk for e-post.  

 Kommunestyret har bede administrasjonen om å vurdere framtidig ressursbruk, struktur og kapasitet i barnehagar og skular i Ulstein kommune. Målet er å vurdere korleis oppvekstsektoren i Ulstein best kan verte organisert for å oppnå høg kvalitet, god ressursutnytting, nok kompetanse, godt læringsmiljø og utvikling i tråd med kommunale mål, samtidig som vi skal oppnå ei innsparing.   

I undersøkinga sendt ut til føresette er der spørsmål om ein opplever at barnet har gode venner på skulen og tre spørsmål knytt til bruk av skulebygg og uteområde etter skuletid. 

Det skal sendast ut spørjeundersøking til elevar og tilsette, og vi kjem til å sjå på resultat frå elevundersøkinga som vart gjennomført i fjor. Samla sett håper vi på at vi får eit godt kunnskapsgrunnlag.  

 Når det gjeld å opne for kommentarar i denne spørjeundersøkinga valde vi det vekk, då undersøkinga vert sendt ut til veldig mange og det gjer det krevjande å handtere informasjonen på ein god måte.  Vi ser at vi får ein del spørsmål gjennom prosjektsida og det vil vere anledning til å komme med kommentarar når saka vert lagt ut på høyring.  

Spørsmål 18. mars: Viser til denne sida: 1-elevtalsutvikling.pdf og lurer på; Kvifor bruke tal som er 15 år gamle? Er det for å sette fokus på at elevtalet går nedover? Hadde ein tatt utgangspunkt 5 år bak, hadde kurva vore mykje flatare.

Svar: Hei og takk for e-post.  

Bakgrunnen for at vi har valt å nytte tal 15 år tilbake i tid er viktigheita av å sjå statistikk over eit lengre tidsperspektiv for å identifisere langsiktige trendar og mønster, samt det reduserer effekten av tilfeldige variasjonar. Eit langsiktig perspektiv gir eit meir solid grunnlag for å ta ei avgjerd.  

Spørsmål 23. mars: Hei. Er det mogleg å få ei oversikt over undervisningskostnadane for kvar skule med samme detaljgrad som den for skulebygga? Gjerne for både 2024 og 2025, med spesifikasjon på kvar meirforbruket i år ligg. 

Svar: Vedlagt finn du delrapport som svarar ut kostnaden for undervisning per elev for kvar skule. rapporten vil verte lagt ut på prosjektsida i løpet av vekla. grunnlaget for rapporten er frå 2024. rapport for 2025 er ikkje klar enno.

Vedlegg  (PDF, 147 kB)

Spørsmål 24. mars: Eg kunne tenkt meg meir detaljar av kva som generer kostnadane. Lik oppdeling som for skulebygg. 

Svar: Hei.

Kunnskapsgrunnlaget vert oppdatert med eit rekneark som viser funksjonane 202 grunnskule og 215 skulefritidsordning per skule. Vi kjem til å legge ut dette i løpet av kort tid.

Eg legg ved fila her slik at du har den no.

Vedlegg (XLSX, 35 kB)
 

Spørsmål 25. mars: Hei. Eg ser de har delt kostnadar per elev frå regnskap 2024. Korleis trur de at desse tala ser ut i 2030/31? Då har elevtalet endra seg på fleire skular. 

Svar: Hei og takk for spørsmål.

Det er mange ulike faktorar som spelar inn når ein skal rekne ut kostnadsnivået på ein skule fram i tid. Utvikling i faktisk elevtal, lønn og generell prisauke gjer at ei slik kalkyle vert høgst usikker. Korleis vi vel å organisere oppvekstsektoren vil også kunne gjere store utslag.

På grunn av så mange ulike faktorar er vi redd for at ei slik prognose vil vere for usikker.

Spørsmål: Kva potensiale er det for innsparingar ved Hasund skule? 

Svar: Hasund skule ligg over lærarnorm og har høg bruk av fagarbeidar og assistent. Til neste skuleår har alle skulane fått utdelt stillingsheimlar der ein har teke ned ressursbruken for å avstemme med lærarnorm og snitt for fagarbeidarar og assistentar. Dette gjeld også Hasund skule. 

Spørsmål: Veit de meir nøyaktig dato for når administrasjonen si tilråding går ut på høyring? På tidslinja vises no kun at der vil vere høyring juni-august. 

Svar: Saka vert lagt fram politisk i veke 23. Ein kan orientere seg om innhaldet då. Høyringa vert lagt ut etter møtet i kommunestyret 19.juni. 

Spørsmål: Er det noko i det talmaterialet som administrasjonen legg til grunn som kan tilseie at der er plass til fleire elevar på Hasund skule dei neste åra? Blir det tenkt at dei ytre rammene for romkapasitet og uteområde da fortsatt vil halde mål?

Svar: Det vart gjort eit omfattande kartleggingsarbeid mht. skulekapasitet av Norconsult AS i 2016, i samband med utarbeiding av Ulstein kommune sin skulebehovsplan (2016-2030) (vedteke 28.04.20116 av Ulstein kommunestyre i sak PS 16/22).

Mykje av informasjonen er like aktuell i dag då det ved fleire av skulane ikkje har vore vesentlege endringar i hovudfunksjonar og areal.

I skulebehovsplanen vurderte Norconsult kapasiteten til skulebygga på bakgrunn av fleire ulike faktorar (til dømes tilgjengeleg støtteareal, klasserom, grupperom, spesialrom osv.) Denne vurderinga vil framleis vere aktuell spesielt for Haddal, Hasund og Ulstein der det ikkje har vore gjennomført vesentlege kapasitet- og/eller bygningsmessige endringar. For Ulsteinvik barneskule har det skjedd vesentlege endringar med nytt påbygg og auka kapasitet.

Med bakgrunn i skulebehovsplanen har vi supplert og justert informasjonen til dagens bruk med data frå kommunen sitt FDV system FAMAC og uttale frå skuleleiinga ved kvar enkelt skule.

Vurdering av kapasitet: Vurdering av kor mange elevar og tilsette den enkelte skule har plass til, er i stor grad basert på lokalt skjønn og tek i hovudsak utgangspunkt i det gamle klassedelingstalet. For å sikre ei mest mogleg likebehandling og lik areal- og kapasitetsvurdering er elevkapasiteten i grunnskulane vurdert etter fastsette metodar, slik at alle skulane blir vurdert etter same kriteria.

Skuleskildringa vert lagt ut på prosjektsida denne veka og er lagt ved denne e-posten.

Vedlegg (PDF, 2 MB)

Spørsmål: Bruk av Haddal skule på ettermiddag. Eg finn ikkje oversikta over idrettslaget sitt bruk? Har dei vorte spurt? Dei nyttar skulen dei fleste dagar i veka også. 

Svar: Det er sendt ut e-post med spørsmål om bruk av skulen til idrettslaget. Vi har ikkje fått svar på denne. Dersom vi får svar, kan vi oppdatere kunnskapsgrunnlaget. 

Spørsmål: Kvifor bruke det einaste året haddal skule kom "særleg dårleg ut" når alla andre år viser at dei driv særs effektivt? 

Svar: Vi har brukt dei siste oppdaterte rekneskapstal (2024) som gir det rette bildet om korleis den økonomiske situasjonen er no. 

Spørsmål: Kva ligg i posten vikarbruk? Er den knytt opp til sjukefråvær, eller er det også langtidsvikariat. Kvifor er det så store avvik mellom refusjon på sjukelønn opp mot vikarbruk? 

Svar: I posten vikar vert det ført timar for bruk av vikar anten det er korttidsfråvær eller langtidsfråvær. Korttidsfråvær får vi ikkje refusjon for.

Spørsmål: Korleis meiner de at det er forsvarleg at Hasund skule skal kunne potensielt ta i mot 130 elevar til? Skulen har berre 7 grupperom, noko som er for lite allereie i den dag i dag. Kvar skal evt dei 130 borna opphaldast? 

Svar: I skulebehovsplanen var det utarbeidd eit framlegg til arealnorm for barnesteget. Denne var tufta på Trondheim kommune si arealnorm for barneskular. I arealnorma blei det lagt til grunn eit nettoareal per elev på 4,7 m2, som har vore brukt for å rekne ut elevkapasitet mht. generelt læringsareal. Dette er over det dobbelte av rettleiande arealnorm for klasserom.

Vi har sett på tal klasserom på dei ulike skulane og vurdert dette opp i mot elevgrupper på 25 elevar. Om vi berre tek omsyn til kapasitet for klasseroma som isolert faktor vil det vere viktig å påpeike at andre areal på skulen kan vere ein avgrensande faktor.

Spørsmål: Når blir svara frå spørjeundersøkinga offentleggjort på prosjektsida?

Svar: Rapporten med resultat frå spørjeundersøkingane vert lagt ut på prosjektsida i løpet av veke 19.

Svar på spørjeundersøking (PDF, 5 MB)

Spørsmål: Oppfølgingsspørsmål til UDIR – økonomisk analyse. 

1. Brutto driftsutgift per elev i Ulstein auka med 10 % i 2023, frå 156 573 i 2022 til 172 776 i 2023, og. Er det gjort noko analyse av årsaka til denne veksten? Det einaste eg finn er at det plutseleg var 15 ordinære undervisningsårsverk meir enn minstekravet på Ulsteinvik barneskule i 2023 (ref. lærernormkalkulatoren på UDIR sine sider), så reknar med det kan forklare ein del av oppgangen? Har de eigne tal for 2024 som viser om det har retta seg? 

2. Samtidig som Brutto driftsutgift per elev aukar kraftig i 2023, så ser Netto driftsutgifter til å ligge på snittet av Kostragruppe 1, og på linje med Herøy, Ørsta og Volda (rundt 150 000 per innbyggar 6-15 år). Kva er skilnaden på netto og brutto driftsutgift? Er det auke i rentekostnad som spelar inn på auka i brutto driftsutgifter i 2023 (og 2024), eller er det noko anna som utgjer forskjellen?

Svar: Dokumentet UDIR analyse er no oppdatert (15.05.25) og trur det vil vere oppklarande i forhold til innspela dine

Spørsmål: Er barna frå asylmottaket medrekna i dei ulike talgrunnlaga for Ulstein skule? Etter det eg kan sjå på antal 1.kl komande år, kan det sjå slik ut. Stemmer det?

Svar: Ut i frå kartdata er at det 11 barn som skal starte i 1. klasse komande år i krinsen. Då er ikkje asylmottaket medrekna då dei som bur der ikkje har bustadadresse i Ulstein.

Spørsmål: Skuleskildring med kapasitetsvurering I Norkonsult sin rapport frå 2016 vert brakkebygget på Hasund skule vurdert til å vere «… av meir førebels karakter. I eit langsiktig perspektiv har ikkje dette bygget kvalitetane som blir lagt til grunn for gode læringsareal. Sjølv om vi reknar klasseromma i hovudbygget som den reelle og langsiktige kapasiteten på skulen, utgjer dette bygget ein vesentleg kapasitet slik det er i dag. Bygget kan nyttast i fleire år framover.» I kommunen sin eigen kapasitetsvurdering er Norkonsult si 10 år gamle formuleringa gjengitt ordrett, og lagt til grunn for at kapasiteten på skulen er 280 i staden for 207. Eg har følgande spørsmål: 1. Kva ser kommunen som forventa restlevetid av dette bygget? 2. Eksisterer det tilstandsrapportar eller uttale frå kommuneoverlege eller andre instansar som klarerer dette bygget som gode læringsareal i 2025? 3. Er det fornuftig å konkludere med ein elevkapasitet på 280 på Hasund skule når ein veit at dette er høgst midlertidig utan omfattande kostnadar?

Svar: Takk for dine spørsmål i samband med skulekapasitet og status for brakkebygget ved Hasund skule. Under finn du svar på dei tre punkta du tek opp:

1. Forventa restlevetid for brakkebygget:

Brakkebygget vart oppført som ei mellombels løysing, og er no brukt utover det som var planlagt som levetid. Kommunen vurderer at bygget forsett kan nyttast i ein periode framover, men det har klare avgrensingar både teknisk og pedagogisk. Det bør ikkje reknast som ein varig del av skulen si kapasitet.

2. Tilstandsrapportar eller faglege vurderingar:

Vi har per i dag ikkje nye tilstandsrapportar eller eigne uttalar frå kommuneoverlegen som stadfestar at brakkebygget tilfredsstiller dagens krav til gode læringsareal. Bruken byggjer på tidlegare godkjenning og intern oppfølging frå eigedomsforvaltinga. Samtidig erkjenner vi at det ikkje held mål som permanent undervisningslokale.

Vedlagt ligg rapportar om Inneklima og kartlegging. Det er og mogeleg for oss å engasjere AVONOVA til eit informasjonsmøte kring tema.

3. Vurdering av kapasitet på 280 elevar:

Vert vurdert i saka som skal ut på høyring.

Vedlegg: Inneklimavurdering (PDF, 2 MB) Kartleggingsrapport luft (PDF, 502 kB)

Spørsmål: I drøftinga om elevkapasiteten på Hasund skule vert den først vurdert til 207 elevar om ein legg til grunn faktor for å rekne ut kapasitet basert på skulebygg med tradisjonelle klasserom. Dette tilsvarar om lag 15 elevar per klasserom. Dagens klasserom har gjerne litt meir teknisk utstyr og innredning som gjer at dei ikkje nødvendigvis er så tradisjonelle som dei var då Norkonsult skreiv rapporten for 10 år sidan, og dermed er truleg reell kapasitet difor noko mindre enn 207 og i alle fall ikkje over. Men likevel vert det i neste avsnitt vist til at ein har brakkebygget, og dermed kan ein sette 25 elevar inn i vart klasserom i hovudbygget, og på den måten få ein elevkapasitet på 280 – som er kommunen sin konklusjon på elevkapasitet. Eg har følgande spørsmål: 1. Meiner kommunen at det er mogleg og forsvarleg med 15-25 elevar per klasserom på Hasund? 2. Ein samanslått skule Hasund/Haddal vil bli på om lag 200 elevar. Og om den reelle kapasiteten er i underkant av 207 elevar, så betyr det at det i praksis ikkje er rom for innbyggarvekst i skulekrinsen. Er kommunen samd i denne vurderinga?

Svar: Spørsmåla dine er gode innspel og noko vi tek med oss i arbeidet når vi ser på løysingar.

Spørsmål: Det står innleiingsvis i rapporten at Norkonsult-rapporten er supplert og justert informasjonen til dagens bruk med data frå kommunen sitt FDV system FAMAC og uttale frå skuleleiinga ved kvar enkelt skule. Kan de legge ut relevant informasjon frå FDV og FAMAC, samt uttalene frå skuleleiinga for kvar av skulane?

Svar: .Justeringane der ein har nytta informasjon frå FAMAC gjeld i hovudsak B-bygget ved Ulsteinvik barneskule og gjeld arealvurderingane som går fram i tabell på side 18 i rapporten.

Rektor/skuleleiing har gjennomgått norconsultrapporten og uttale/endringar er ordrett lagt inn i dokumentet under kvar enkelt skule.

Spørsmål: I og med det har vore vanleg at fleire born frå osneset og tildels reiten har valgt å nytte Ulstein skule, så er det synd at dette ikkje kjem fram i talgrunnlaget, eller vert nevnt i utgreiingane. Dette meinar eg må fram og og også takast med i vurderingane. Kvifor vert dette utelatt? Dette er familiar som aktivt vel vekk ein større sentrumsnær skule.

Svar: Vi har fleire elevar som går på ein annan skule enn den skulekrinsen dei høyrer til. I kunnskapsgrunnlaget kan ein sjå det ved at ein samanliknar tal på elev ved ein skule og tal på born i skulekrinsen.

Spørsmål: Kan det vere eit insparingstiltak å selge den nye b.hagen som kjem i Hasund til ein privataktør, om nokon viser interesse? Og dermed ta innigjen noko, om ikkje alle utgiftene ved nybygginga? I og med nybygginga vil kreve ein stor del av budsjettet til oppvekst?

Svar: Vi må forhalde oss til kommunestryet sitt vedtak i desember der dei vedtok at barnehagen i Hasund krins skal byggast. Dersom ein skal utgreie eit eventuelt sal av dette bygget i framtida, må det vere ei eiga politisk sak med ei bestilling til administrasjonen om å utgreie dette.