Familieterapeut og foreldrerettleiar Gry Jonberg og leiande helsesjukepleiar Kristin Meli, har lånt seg ein liten og kontaktsøkande Isak som skal på kontroll på helsestasjonen. Janne-Marit Myklebust

– Lille Petter Edderkopp, syng Gry Jonberg.

Vesle Isak følger spent med på fingrane hennar som klatrar oppå kvarandre som ein edderkopp.

Eigentleg skulle han berre på ein heilt vanleg kontroll, men vart fort huka tak i for å vere med på eit bilde saman med to engasjerte helsestasjonstilsette.

Tryggheitssirkelen

Leiande helsesjukepleiar Kristin Meli og familieterapeut og foreldrerettleiar Gry Jonberg fortel engasjert om tilknytingsteori og om korleis vi best kan møte barna våre.

– Vi har verkeleg satsa på dette her på helsestasjonen, fortel Jonberg.

– Alle tilsette er kursa – eller står på vent for å verte kursa – i COS.

COS står for Circle Of Security. Tryggheitssirkelen.

Og no er dei klare for å dele kunnskapen sin med foreldre og føresette til den oppveksande generasjon i Ulstein.

Målet er at barnet ditt skal få hjelp til å kjenne seg trygg, og på den måten stå sterkare rusta til å møte utfordringar i livet. Dette gjennom trygge og tydelege vaksne.

Forstå barna

– Vi har i to år gitt dette tilbodet i barnehagane våre. No er vi på helsestasjonen, og vi utvidar aldersgruppa til å gjelde også barn i grunnskulealder. Vi ønsker at alle skal forstå ungane sine, mellom anna gjennom refleksjon. Samstundes skal du verte trygg på at det du har med deg inn i foreldrerolla, og den du er, er godt nok det også, seier Jonberg.

– Berre det å møte andre foreldre og få ein samtale, kan gjere godt det også, seier Meli.

– Gry Jonberger eit funn for oss! Ho gjer ein uvurderleg innsats!

Gode tilbakemeldingar

Foreldrekurset har fått gode tilbakemeldingar tidlegare.

• “Eg har lært mykje om meg sjølv”
• “Det har hjelpt meg til å takle kvardagen betre”