Statsforvaltar stadfestar at vedtaka er gjort av rett organ, på lovleg måte og med eit lovleg innhald. Dette betyr at Statsforvaltaren ikkje finn grunnlag for å gjere endringar i avgjerdslene kommunestyret har fatta.

I si vurdering peikar Statsforvaltaren at kommunestyret er kommunen sitt øvste politiske organ, og har fullmakt til å fatte vedtak om både skulestruktur og organisering. Det har dermed ikkje vore tvil om at vedtaka er gjort av riktig myndigheit. 

Vidare vurderer Statsforvaltaren at saksbehandlinga har vore forsvarleg. Ulstein kommune har valt å gjennomføre endringar i skulestrukturen i tre trinn: først sjølve vedtaket om struktur, deretter innarbeiding av innsparinga i budsjett og økonomiplan, og til slutt endringar i forskrift om skulekrinsgrenser. 

Når det gjeld innhaldet i vedtaket, understrekar Statsforvaltaren at spørsmål om skulestruktur ligg til kommunestyret sitt frie skjønn. Kommunestyret har vurdert relevante omsyn i saka og i saksutgreiinga frå kommunedirektøren har barnets beste vore særleg vektlagt. Statsforvaltaren peikar på at dette omsynet er synleg ivaretatt i kommunestyret si avgjerd.

Kommunestyret fekk ei grundig og brei utgreiing som vurderte ulike alternativ strukturar der vedtaket vart at Ulstein skule og Ulsteinvik skule skal slåast saman. Statsforvaltaren konkluderer med at dette er eit lovleg vedtak som byggjer på ein forsvarleg prosess og på vurderingar som ligg innanfor det handlingsrommet kommunestyret har.

Her er Statsforvaltar sitt brev til Ulstein kommune. (DOCX, 58 kB)