Velferdsteknologi er ei fellesnemning på tekniske installasjonar og løysingar som kan betre den enkelte si evne til å klare seg sjølv i eigen bustad, og bidra til å sikre livskvalitet og verdigheit for brukaren. 

Velferdsteknologi kan delast i fire kategoriar:

1. Tryggleiksskapande teknologi
2. Meistringsteknologi 
3. Utredning- og behandlingsteknologi
4. Velværeteknologi

På Direktoratet for e-helse sine nettsider finn du meir informasjon.

Målet med velferdsteknologi er å skape ein tryggare og enklare kvardag både for brukaren, pårørande og omsorgspersonell. Tenesta skal mogleggjere at fleire kan bu heime lenger, den skal styrke meistring i kvardagen og bidra til at brukaren kan leve eit aktivt og sjølvstendig liv. Velferdsteknologi vil gi betre behandling og oppfølging av personar med kroniske sjukdomar, og ei betre utnytting, auke i kapasitet og kvalitet i helse- og omsorgstenestene. Bruk av velferdsteknologi handlar ikkje om alder eller diagnose, men om behova til den enkelte. 

Ulstein kommune tilbyr velferdsteknologi som ein del av tenesta i helse og omsorg.

Digital tryggleiksalarm

Tryggleiksalarm er eit hjelpemiddel for den som treng å tilkalle hjelp med ein alarmknapp. Når du trykker på alarmknappen vert det oppretta samband med heimetenesta. Heimetenesta tek anten kontakt direkte med brukaren eller med pårørande, og set i verk naudsynte tiltak. 

Dør- og vandrealarm

Dør- og vandrealarm kan varsle tenesta når brukar opnar døra og går ut innanfor gitte tidsrom. Heimetenesta tek anten kontakt direkte med brukaren eller med pårørande, og set i verk naudsynte tiltak.

Elektronisk medisineringsstøtte

Dersom folk treng hjelp til medisinering, vert dei tildelt ein medisindispenser dersom dette er føremålstenleg for dei. Per i dag er det Evondos som er i bruk i Ulstein. 

GPS

GPS er eit hjelpemiddel for å lokalisere ein person. Ulstein kommune tilbyr utlån av GPS til personar med demens eller som av andre årsaker er hindra frå å bevege seg sjølvstendig utandørs.

 

 

Våre GPS-ar har ein alarmknapp som kan nyttast til å tilkalle hjelp, og den som tek imot alarmen kan ringe til GPS-en og lokalisere brukar. Vi har både GPS-klokker og GPS til å ha i lomme eller rundt halsen.

Digitalt tilsyn

Digitale tilsyn er eit alternativ eller eit supplement til fysiske tilsyn frå personalet på sjukeheim eller i heimeteneste. Det kan vere utstyr som følger med på om ein bebuar er i senga si på natta eller om nokon har falt. Det finst fleire typar av slik teknologi. Ulstein nytter per i dag sensoren Somnofy og Roomate. Du kan lese meir om Somnofy her og om Roomate her. 

• du som har behov for tenester frå helse og omsorg same kvar du bur i kommunen 
• du som ønsker å vere aktiv og bu heime 
• du som er motivert til å klare deg sjølv

Dersom dette er nødvendig helsehjelp, er tilbodet gratis. Andre tiltak kan innebere kostnadar for brukaren.  

Kommunen har plikt til å behandle søknaden din så snart som mogleg. Dersom det ikkje vert avgjort innan 4 veker skal du ha skriftleg melding om dette, med opplysningar om når du kan vente at det vert gjort vedtak i saka.

Vi nyttar ressursorientert saksbehandling. Det vil seie at vi er opptekne av kva innbyggarar klarer sjølve, kva pårørande og anna nettverk kan hjelpe til med, og kva omsorgsetaten kan bidra med. Dette får vi til gjennom samarbeid og dialog med kvarandre, der målet er at innbyggarar med hjelpebehov, skal kunne leve eit mest mogleg sjølvstendig liv.

Vurdering

Vi kartlegg behovet ditt for tenester.

Saksbehandlar vil kontakte deg for å snakke med deg om søknaden og avtale eit heimebesøk dersom det vert vurdert som naudsynt.

Når det vert gjort vedtak i saka vil det gå fram om du har fått tildelt tenesta eller ikkje, og kva tenesta omfattar. Du vil også få ei grunngiving for vedtaket.

Dersom du ikkje er nøgd med vedtaket kan du klage til kommunen innan fire veker frå du fekk vedtaket. 

Forklar kva du er misfornøgd med og kvifor du meiner at vedtaket bør endrast. Kommunen pliktar då å ta ei ny vurdering.

Vert avgjerda ståande, vert saka sendt vidare til Statsforvaltaren. Dette får du melding om.

Send klaga di til

Ulstein kommune v/kommunalsjef helse og omsorg, postboks 143, 6067 Ulsteinvik.

Rådgivar Hildegunn Utgård – hildegunn.utgard@ulstein.kommune.no
Telefon 48 26 06 20