Heimesjukepleie er eit tilbod til deg som har behov for nødvendig helsehjelp, opptrening, opplæring eller hjelp til å meistre daglege aktivitetar. 

Dei tilsette i heimesjukepleia kan mellom anna hjelpe deg med å

• ta medisinar som er ordinert av lege/sjukehus via e-link
• legge til rette måltid
• hjelpe deg med personleg hygiene (Fotpleie og hårvask/hårpleie utanom dusj, vert berre utført dersom du ikkje har pårørande/nettverk og ikkje sjølv klarer å oppsøke frisør/fotpleiar)
   

Heimesjukepleia vil legge til rette for at du skal klare deg mest mogleg sjølv, slik at du framleis kan bu heime.

Heimesjukepleia kan vurdere behov for hjelp til medisinske prosedyrar etter tilvising frå lege/sjukehus.

Du kan forvente at

• dei tilsette har nødvendig helsefagleg kompetanse
• det nokre gongar kjem assistentar, lærlingar eller studentar heim til deg, sidan vi er ei lærande verksemd
• at vi har synleg legitimasjon

Vi forventar at

• du gjer dei aktivitetane du klarer sjølv
• du er positiv til å prøve ut ny teknologi (velferdsteknologi) som kan hjelpe deg til at kvardagen din vert enklare og meir sjølvstendig
• du tek i mot hjelpemiddel som vert vurdert som føremålstenlege
• du har synleg namn og nummer på huset ditt
• du gir oss beskjed i god tid om du ikkje treng hjelp, eller om du skal reise vekk
• du luftar godt inne om du røyker, og ikkje røyker rett før vi kjem
• du har mikrobølgeomn dersom du treng hjelp til/skal trene på å varme middag
• du har personvekt dersom du får hjelp til veging
• du eller nettverket ditt ordnar transport sjølv
• du eller nettverket ditt hentar sjølv varer på apoteket
• du gir tilbakemelding dersom behovet ditt endrar seg/du ikkje er nøgd med dei tenestene du får

Kommunen har plikt til å behandle søknaden din så snart som mogleg. Dersom det ikkje vert avgjort innan 4 veker skal du ha skriftleg melding om dette, med opplysningar om når du kan vente at det vert gjort vedtak i saka.

Vi nyttar ressursorientert saksbehandling. Det vil seie at vi er opptekne av kva innbyggarar klarer sjølve, kva pårørande og anna nettverk kan hjelpe til med, og kva omsorgsetaten kan bidra med. Dette får vi til gjennom samarbeid og dialog med kvarandre, der målet er at innbyggarar med hjelpebehov, skal kunne leve eit mest mogleg sjølvstendig liv.

Vurdering

Vi kartlegg behovet ditt for tenester.

Saksbehandlar vil kontakte deg for å snakke med deg om søknaden og avtale eit heimebesøk dersom det vert vurdert som naudsynt.

Når det vert gjort vedtak i saka vil det gå fram om du har fått tildelt tenesta eller ikkje, og kva tenesta omfattar. Du vil også få ei grunngiving for vedtaket.

Heimesjukepleie er ei gratis teneste.

Medisinar og diverse utstyr som støttestrømper og anna må du betale for sjølv.

Dersom du ikkje er nøgd med vedtaket kan du klage til kommunen innan tre veker frå du fekk vedtaket. 

Forklar kva du er misfornøgd med og kvifor du meiner at vedtaket bør endrast. Kommunen pliktar då å ta ei ny vurdering.

Vert avgjerda ståande, vert saka sendt vidare til Statsforvaltaren. Dette får du melding om.

Send klaga di til

Ulstein kommune v/kommunalsjef helse og omsorg, postboks 143, 6067 Ulsteinvik.

• Lov om pasient- og brukarrettar
• Lov om kommunale helse- og omsorgstenester
• Forvaltningslova