Kontaktlærarane har fått i oppgåve å gjennomføre ei ikkje-anonym spørjeundersøking som heiter Spekter. Spekter kan brukast til å avdekke mobbing og til å kartlegge læringsmiljøet i ei skuleklasse. Ved å bruke Spekter får ein i denne samanhengen informasjon om kven elevane er trygge på og relasjonar mellom elevane. De kan lese meir om undersøkinga her: Spekter | Universitetet i Stavanger 

 I tillegg til Spekterundersøkinga vil det i kontaktmøte denne våren vere ei god anledning til dialog med føresette. Føresette sitt perspektiv er verdifullt når det gjeld bekymringar for barnet sin tryggleik og trivsel eller behov knytt til helse, utvikling og språk. 

 Rektor har informasjon om elevar som treng særskilt trygging og tek omsyn til dette i arbeidet med ny organisering.  

 Skulen har ansvar for heilskapsvurderinga av heile årstrinnet. Skulen sin faglege vurdering må alltid vere styrande når ein skal dele inn i nye klasser.  

Tilsette ved både Ulstein skule og Ulsteinvik barneskule har saman laga ein plan for overgang som er ulik for kvart trinn.  

Planen er delt inn slik:  

 Førebuingsfase.  

Målet er å skape tryggleik, gi informasjon og vekke nysgjerrigheit.  

Under overgangen (møte- og bli kjent) 

Mål: Skape relasjonar og tryggleik i nye omgjevnader.  

Etter overføringa (oppfølging) 

Mål: Sikre at elevane trivast, får vener og kjem inn i læringsmiljøet.  

Oppfølging og evaluering:  

Elevundersøkingar  

Kontaktmøte med føresette  

Sosiallærar og elevråd involverte 

Det vil vere variasjon i innhald og omfang av aktivitet på dei ulike trinna, men alle arbeider etter planen. Vi vil ha som mål at informasjon om aktivitetane kjem på vekeplanen og at vi får lagt ut bilete og tekst av nokre aktivitetar på heimesida.  

For elevar som kjem inn i klassemiljø som er etablerte vil ein fylje med og hjelpe til for at elevane skal finne sin plass.  

Det er bestemt at første undervisningstime Ulsteinvik barneskule startar 08:30. Vi har vurdert å starte tidlegare, men det vart vanskeleg å få til. Skulen opnar dørene for alle elevane 08:15. Då er læraren som skal ha første undervisningstime der og tek i mot elevane. Vi er opne for å finne ei løysing for elevane som kjem med buss frå Ulstein skule om vi ser at det er behov for at dei kan få ein stad å vere saman i tidsrommet før læraren kjem på klasserommet. 

I arbeidet med å slå saman Ulstein skule og Ulsteinvik barneskule vert det endringar for elevane frå begge skulane. Det vert oppretta nye klasser på fleire av trinna og elevane får nye lærarar og klassekameratar. Vi ser at det vert ein annleis og spennande oppstart for mange av elevane våre neste haust. Lærarane som arbeider med elevane i dag gjer ein god innsats i å sørge for at dette skal gå fint og eg er sikker på at føresette vil vere med å bidra også. Å skape felleskjensle vert viktig å gjere saman framover. 

Send ein e-post til karen.strand@ulstein.kommune.no så vil vi svare deg