Sundgotmarka barnehage Ulstein kommune

Arbeidet med Sundgotmarka barnehage held fram i tråd med planlagt framdrift. 

Prosjektet er eit viktig satsingsområde for å styrke barnehagetilbodet i kommunen, og vil gi kapasitet til 72 barn, med totalt 96 plassar.

Prosjektet har no kome til eit viktig steg der grunnentreprisen vert lyst ut. Dette markerer starten på den første større gjennomføringsfasen i prosjektet. 

Med utlysinga blir entreprenørmarknaden gjort kjend med prosjektet, og interesserte entreprenørar får høve til å levere tilbod på grunnarbeida. 

Konkurranse er kunngjort på Doffin

Tilbodsfrist er sett til 17.08.26 kl 12.00.

- Grunnarbeidet startar til hausten

- Etter planen skal grunnarbeida starte opp tidleg i haust, medan sjølve byggentreprisen er planlagt lyst ut seinare på hausten. Dette legg til rette for vidare framdrift i prosjektet og sikrar at arbeidet kan gå stegvis og kontrollert framover, seier eigedomssjef i Ulstein kommune, Ottar Håkonsholm. 

- Samtidig held arbeidet fram med viktige avklaringar knytt til kvalitetar, miljøkrav og brukarinnspel. Det er også gjort vurderingar av rekkefølgjekrav og behov for eventuelle dispensasjonar. Dette er sentrale element for å sikre eit godt og framtidsretta prosjekt. 

- Ein trygg og oversiktleg kvardag for born og tilsette

Planløysing og utomhusplan er utvikla med vekt på funksjonelle løysingar, gode leike- og opphaldsareal og ein trygg og oversiktleg kvardag for både born og tilsette.

Den økonomiske ramma for prosjektet er sett til 70 millionar kroner inkludert meirverdiavgift. Kalkylane vert oppdaterte fortløpande, og endringar som er gjorde i prosjektet er innarbeidde. 

- Samla vurdering er at prosjektet utviklar seg godt og held framdrifta etter oppsett plan. Den komande perioden vil vere viktig for å sikre god konkurranse i marknaden og få på plass entreprenør for grunnarbeida, seier Håkonsholm.