Eivind Berge frå entreprenøren Aurvoll & Flusund, tidlegare ordførar Knut Erik Engh, ordførar Stian Skorgen Scheide og personleg bidragsytar Roger Brudevoll i dragkamp om tørkepapiret for å markere offisiell opning av sanitæranlegget på Osneset. Janne-Marit Myklebust

– Dette har vore eit lite hjartebarn for meg, og det var vi som i utgangspunktet fekk pengane inn på budsjettet, sa tidlegare ordførar og noverande kommunestyremedlem Knut Erik Engh, som var spesielt invitert til markeringa på Osneset.

Knut Erik Engh studerer fasilitetane og konkluderer med at kvaliteten er upåklageleg. Janne-Marit Myklebust

Det er nemleg han som står bak forslaget om plasseringa av det svært etterlengta sanitæranlegget, kan kommunalsjef teknisk Arne Runar Vik fortelle.

– Dette har vore eit etterspurt tiltak i lokalmiljøet i fleire tiår. Etter politisk initiativ kom det med i økonomiplanen i 2018, men det har vore vanskeleg å bestemme kvar anlegget skulle plasserast. Knut Erik hadde ein idé om å spørje soknet om å få sette det på deira grunn ved gravplassen, og det var lutter vilje frå dei. Tiltaket kjem både badarane, turgåarane og soknet til gode, seier Vik.

Sanintæranlegget ligg skjerma til i enden av parkeringsplassen ved Osnessanden/kyrkjegarden. Janne-Marit Myklebust

Nesten gratis

Toalettet har adgangskontroll. Det vil seie at du må ha bankkort for å få opp døra. Førebels er summen sett til symbolske 1 krone.

– Med adgangskontroll kan kommunen opne det når dei ønsker det og lukke det når det trengst. Ei god løysing, vurderer Engh.

Sanitæranlegget er også utstyrt med utvendig dusj for dei badande, som ordføraren her så velvillig demonstrerer. Janne-Marit Myklebust

Engh og ordførar Stian Skorgen Scheide fekk æra av å offisielt opne sanitæranlegget ved å måle styrke ved å rive ein symbolsk dorull.

Og det var tidlegare ordførar Knut Erik Engh som trekte det lengste tørket, med god hjelp frå dorullhaldar Eivind Berge frå entreprenøren Aurvoll & Fursund.  

– Og med det er Osneset toalett og dusj offisielt opna, kunne ordføraren meddele. 

Janne-Marit Myklebust

Arne Runar Vik rosa også entreprenøren Aurvoll & Flusund for vel gjennomført arbeid, Roger Brudevoll for sitt personlege bidrag til anlegget, soknet for velvilje og prosjektleiar Harald Øvereng og avdelingsleiar Jørgen Hageselle frå kommunen for god prosjektgjennomføring.

– Ta godt vare på anlegget, var oppmodinga frå alle!

Stødig plassering av sanitæranlegget tidlegare i vår. Harald Øvereng

Sanitæranlegget er plassert skjerma ved kyrkjegardsmuren på Osneset. Harald Øvereng