Vararordførar Lisa Mari Breivik Anderson bryt grunnen på tomta der det skal byggast ny Sundgotmarka barnehage. Ulstein kommune

- Dette er noko som har vore jobba med i lang tid, og det er ei spesiell kjensle når gravinga no er i gang, seier varaordførar i Ulstein kommune, Lisa Mari Breivik Anderson, før ho tek det symbolske første spadetaket på tomta til nye Sundgotmarka barnehage.

Varaordføraren fekk nytte gravemaskina til det første “spadetaket”, medan ordførar Stian Skorgen Scheide bidrog med spaden sine og gummistøvlar på. 

- Dette blir eit kjempeløft for Hasund som krins. Eg er glad for at vi har kome fram til eit konsept som står seg godt både økonomisk og fagleg. Veldig mange har venta lenge på dette, og eg veit at mange gler seg til den dagen vi kan opne dørene til den nye barnehagen, seier ordførar Stian Skorgen Scheide.

Lokal grunnentreprenør 

Denne dagen markerer starten på grunnarbeidet, som blir utført av den lokale entreprenøren Nord-Berg. 

- Det er kjekt å få dette oppdraget. Og det er kjærkome i ei tøff tid for entreprenørbransjen. Vi er spenna klar for oppdraget og håpar å vere ferdige til jul, seier dagleg leiar i Nord-Berg, Hans Petter Th. Ulstein.

F.v.:Børre Dyrkorn (Ulstein kommune, prosjektleiar Anne Hestflått (Ulstein kommune, dagleg leiar i Nord-Berg, Hans Petter Th. Ulstein, Sigve Sævik Ulstein (Nord-Berg) og anleggsleiar John-Roger Hjørungdal (Nord-Berg). Ulstein kommune

- Målet er at ny barnehage står klar i 2028

Den nye barnehagen skal gi trygge, moderne og framtidsretta løysingar for barn og tilsette og skal ha 96 plassar.

Ulstein kommune har planlagt planløysingar, uteområde, trafikktryggleik og funksjonelle areal i tett dialog med brukargrupper og fagmiljø.

Etter anbodsrunde er det Nord-Berg som skal utføre grunnarbeidet. Bygginga av ny barnehage vil bli lyst ut som totalentreprise i løpet av hausten. 

- Om alt går etter planen, kan den som blir valt som totalentreprenør byrje bygginga av nye Sundgotmarka barnehage etter årsskiftet, seier prosjektleiar i Ulstein kommune, Anne Hestflått. 

- Målet er at ny barnehage skal stå klar i første del av 2028. 

Ordførar Stian Skorgen Scheide stilte med eigen spade for å hjelpe til med det første spadetaket for ny Sundgotmarka barnehage. Ulstein kommune

- Viktig for heile kommunen

- Dette har vore ein veldig lang prosess, men no er grunnarbeidet i gang. Då er det inga usikkerheit lengre, seier varaordførar Lisa Mari Berivik Anderson etter at ho har tatt det første spadetaket. 

- Eg er både letta og glad no. Kanskje litt trist at mine eigne barn ikkje fekk gå i den nye barnehagen, men kanskje barnebarna, smiler ho. 

- Eg vil takke foreldre, tilsette i Sundgotmarka barnehage og dei folkevalde i Ulstein for engasjementet i saka. Dette er viktig for heile kommunen.

Ordførar Stian Skorgen Scheide, varaordførar Lisa Mari Breivik Anderson og prosjektleiar Anne Hestflått. Ulstein kommune