Radikaliseringskontakt i politiet i Møre og Romsdal, tok opp tema som radikalisering og demokratisk motstandskraft. Ung arena Ulstein

Felix Baldauf og Even Karpuz engasjerte med innlegg om mental helse. Ung arena Ulstein

Frå venstre: Håvard Kristiansen, førebyggar i politiet på Søre Sunnmøre; Silje Kiperberg Aksnes, SLT-koordinator i Hareid kommune; Vedrana Terzic, SLT-koordinator i Ulstein kommune og Arne Sæter, radikaliseringskontakt i politiet i Møre og Romsdal. Ung arena Ulstein

Torsdag 6. november inviterte SLT-koordinatorane i Ulstein og Hareid, Vedrana Terzic og Silje Kiperberg Aksnes, til SLT-fagtreff på Sjøborg kulturhus i Ulsteinvik. 

SLT står for Samordning av lokale rus- og kriminalitetsførebyggande tiltak. Modellen legg til rette for samarbeid mellom kommunale aktørar, politi, frivillige og næringsliv for å skape trygge oppvekstvilkår for barn og unge.

Invitasjonen gjekk breitt ut til tilsette i kommunane som jobbar med barn og unge, frivillige organisasjonar, næringsliv og andre interesserte – og responsen var stor. Om lag 150 deltakarar deltok.

Sentrale innlegg i programmet:

Politiet:

Håvard Kristiansen, førebyggar i politiet på Søre Sunnmøre, snakka om VAAS – violent as a service, eit fenomen som viser korleis vald kan bli tilgjengeleg som teneste.

Arne Sæter, radikaliseringskontakt i politiet i Møre og Romsdal, tok opp tema som radikalisering, skuleangrep og korleis vi kan styrke demokratisk motstandskraft

Begge peika på kor viktig det er å ha kunnskap og samarbeid for å førebygge alvorlege hendingar. Det viktigaste vi kan gjere er å snakke saman og bygge eit   ope og inkluderande samfunn som hindrar utanforskap.

BROR Mental helse:

Felix Baldauf, kjend frå brytarlandslaget, og Even Karpuz, god kamerat av Felix med mastergrad i likestilling og mangfald, heldt eit engasjerande foredrag om openheit rundt mental helse, med særleg vekt på gutar.

Gjennom personlege historier og praktiske verktøy formidla dei korleis vi kan kjenne att og handtere psykiske helseutfordringar. Målet er å skape ein kultur der det å stå saman i utfordringane blir den nye normalen – saman, ikkje åleine. 

Kvifor er dette viktig?

SLT-arbeidet handlar om samarbeid – fagtreffet viste korleis samordna innsats kan gjere ein reell forskjell for barn og unge. Når vi står saman, deler kunnskap og erfaringar og bygger inkluderande fellesskap, legg vi grunnlaget for eit tryggare og meir robust lokalsamfunn.

• Her kan de lese meir om SLT-arbeidet i Hareid kommune.
• Her kan de lese meir om SLT-arbeidet i Ulstein kommune.

Takk til Konfliktrådet for prosjektmidlar som gjorde samlinga mogleg.