Heilskapleg risiko- og sårbarheitsanalyse (H-ROS) er kommunen sitt viktigaste verktøy for å forstå kva som kan gå gale – og korleis vi skal førebyggje og handtere uønskte hendingar.
Analysen gir eit samla bilete av risikoane i samfunnet vårt, og ser spesielt på hendingar som kan få konsekvensar for:
- liv og helse
- samfunnsstabilitet
- natur og miljø
- materielle verdiar
H-ROS er forankra i lovverket og er eit krav til alle kommunar. Den skal brukast som grunnlag for beredskapsplanar, prioriteringar og samfunnsplanlegging.
Andre nyttige lenkar:
Vurderingar av sannsyn og konsekvens
Rettleiar HROS DSB
Scenario
Ulstein kommune har valt ut relevante uønskte hendingar i den heilskaplege ROS-analysen basert på farar og truslar identifiserte gjennom kommunebeskrivinga, tidlegare ROS-analysar og data frå Geonorge og anna kunnskapsgrunnlag.
Kartlegginga viser kva som kan skje i kommunen, og kva hendingar ein må kunne førebyggje og handtere.
På denne bakgrunn er det valt ut scenario som kan gi store konsekvensar, påverke kritiske samfunnsfunksjonar, involvere fleire tenesteområde eller skape uro i befolkninga.
Scenarioa oppfyller relevante kriterium i DSB sin rettleiar og er vurderte som både krevjande og sentrale for kommunen si beredskap.
Under kan du lese om dei ulike scenario som er vurderte i analysen:
Bortfall av elektronisk kommunikasjon
Sabotasje mot sentral infrastruktur fører til at mobil- og fibernett blir borte i heile regionen i fem dagar.
Dette gir store problem for naudetatar, helse, betalingssystem og informasjon, og kommunen må ta i bruk enkle og analoge løysingar.
Atomutslepp frå ubåt
Ein brann i ein reaktordriven ubåt utanfor Grasøyane fører til fare for radioaktivt utslepp.
Det blir sett i verk atomberedskapstiltak med utdeling av jodtablettar og råd om å halde seg innandørs, medan nasjonale myndigheiter handterer situasjonen.
Pandemi
Eit nytt og svært smittsam influensavirus fører til ein langvarig pandemi med fleire bølgjer.
Mange i Ulstein blir sjuke, og helsetenestene står under stort press. Samfunnet normaliserer seg først etter fleire år med tiltak.
Krig og konflikt
Noreg blir utsett for digitale angrep, desinformasjon og sabotasje.
Situasjonen utviklar seg internasjonalt, og Ulstein blir ramma indirekte gjennom forsyningssvikt, energiproblem og digitale angrep. I tillegg blir det retta direkte angrep mot verftsnæringa i kommunen.
Grunnstøyting av cruiseskip
Eit cruiseskip grunnstøyter i svært dårleg vêr og veltar.
Evakueringa skjer under krevjande forhold og involverer eit stort tal passasjerar, mange skadde og fleire omkomne.
Alvorleg valdshending
Ei alvorleg valdshending oppstår på ein skule.
Politiet får kontroll, men situasjonen krev omfattande innsats frå naudetatar og lengre tids oppfølging av elevar, foreldre og tilsette.
Dataangrep
Kommunen blir råka av eit omfattande cyberangrep som også rammar dei andre kommunane i SSIKT.
Tilsette kjem seg ikkje inn i systema, og det viser seg at sensitive opplysningar er på avvegar. Nokre tenester må stengjast for å hindre vidare skade.
Ekstremvêr
Ulstein blir råka av ein kraftig orkan som fører til langvarig straumbrot, stengde vegar, manglande mobildekning og stans i ferje- og båtsamband.
Høg vasstand og store bølgjer skaper store utfordringar i fleire døgn.
Skogbrann
Ein brann startar på Osberget og spreier seg raskt mot bustadområde.
Bustader går tapt, fleire blir evakuerte, og røyken påverkar store deler av kommunen. Totalt blir eit større skogområde øydelagt.
Forureina drikkevatn
Under gravearbeid blir vatn- og avløpsleidningar skadde, og avløpsvatn trekkjast inn i vassnettet.
Det fører til sjukdom hos rundt 300 personar, fleire med alvorlege komplikasjonar. Kommunen sender kokevarsel, forsterkar helseberedskapen og set i verk reinsing og desinfisering av leidningsnettet.
Isolert bygd
Brua mellom Dimnøya og fastlandet kollapsar.
Over 1300 innbyggarar mister vegforbindelsen, og kommunen må raskt etablere mellombels transportløysingar.
Brann på Alvehaugen
Ein brann i ei omsorgsbustad på Alvehaugen fører til krevjande evakuering av sårbare bebuarar.
Éin person omkjem, og fleire blir røykskadde. Hendinga gir store psykiske belastningar for både bebuarar og tilsette.
Brann i vogntog i Eiksundtunnelen
Eit vogntog tek fyr, og brannen utviklar seg raskt.
Mange blir fanga av giftig røyk, og tunnelen får store skadar. Hendinga fører til fleire dødsfall, mange skadde og langvarig stenging av tunnelen.
200 årsstormflo og flaum i sentrum
Ei ekstrem stormflo og ekstremnedbør som gjer at Sauneselva fløymer over fører til at store delar av Sjøgata og sentrum blir sett under vatn.
Bustader, næringsbygg og kommunale tenester blir ramma, og fjernvarme og kritisk infrastruktur blir sette ut av drift.
Stor gasslekkasje frå velta tankbil i sentrum
Ein tankbil med propan velter ut for vegen ned til sjukeheimen og får gasslekkasje.
Området blir evakuert med ein radius opp til 1000 meter på grunn av brann og eksplosjonsfare.
Målsetjing:
Den heilskaplege risiko- og sårbarheitsanalysen for Ulstein kommune viser at kommunen står i eit krevjande risikobilde.
Som ei lita distriktskommune med avgrensa kapasitet, må Ulstein prioritere målretta og realistiske tiltak som styrkjer robustheita i kritiske tenester og evna til å handtere både kortvarige og langvarige hendingar.
Dette kapittelet gir ei samla beskriving av kommunen sine langsiktige samfunnssikkerheitsmål og strategiar, og presenterer overordna tiltak som skal følgjast opp i vidare plan- og beredskapsarbeid.
Kapasitet og kompetanse til å handtere både akutte og langvarige hendingar
Kommunen skal ha tilstrekkeleg kapasitet og kompetanse til å handtere både akutte og langvarige hendingar på ein trygg og effektiv måte.
Ulstein kommune vil jobbe for:
- Å styrkje kompetansen i kriseleiinga gjennom målretta kurs, opplæring og øvingar.
- Prioritere løysingar som er praktiske, gjennomførbare og «gode nok» innanfor kommunens rammer, framfor idealløysingar som ikkje let seg realisere.
Robust og forpliktande interkommunalt beredskapssamarbeid
Ulstein skal jobbe målretta for eit meir robust og forpliktande interkommunalt beredskapssamarbeid.
Ulstein kommune vil jobbe for:
- Felles beredskapsordningar med nabokommunane for å redusere sårbarheit og styrkje kapasitet.
- Rullering og avlasting av nøkkelpersonell ved langvarige hendingar.
- Deling av beredskapsroller og kompetanse, slik at fleire kan fylle kritiske funksjonar.
- Felles ROS‑arbeid og planverk for betre oversikt og samordna beredskap.
- Felles øvingar og kompetanseheving som byggjer eit sterkare fagmiljø på tvers av kommunane.
Oppretthalde kritiske kommunale tenester i kriser og krig
Kritiske kommunale tenester skal kunne oppretthaldast også under kriser og i krig.
Ulstein kommune vil jobbe for:
- Å utarbeide og vedlikehalde kontinuitets- og beredskapsplanar for drift under langvarige hendingar, kriser og krig.
- Sikre klare rutinar for ressursdisponering og prioritering av kommunale tenester ved kapasitetsmangel.
- Vidareutvikle samarbeid med Heimevernet, sivilforsvaret og frivillige organisasjonar for støtte og avlastning i kritiske og langvarige hendingar.
Robuste og samordna digitale løysingar
Kommunen skal ha robuste og samordna digitale løysingar
Ulstein kommune vil jobbe for:
- Å vidareføre arbeidet med cybersikkerheit og delta i felles øvingar på digitale truslar.
- Arbeide for større grad av standardisering av digitale system i samarbeid med nabokommunar, SSIKT og nasjonale myndigheiter.
- Tenkje som “ei digital kommune” i beredskapssamanheng.
Oppretthalde kritiske tenester ved bortfall av straum og ekom
Kommunen skal vere i stand til å oppretthalde kritiske tenester ved bortfall av straum og ekom.
Ulstein kommune vil jobbe for:
- Etablere og vedlikehalde sikre reserve- og satellittbaserte kommunikasjonsløysingar.
- Sikre naudstraum og backup- kapasitet for kritiske tenester og system.
- Styrkje samarbeid med regionale aktørar for handtering av bortfall i kritisk infrastruktur.
- Øve på scenario der straum og EKOM er heilt eller delvis ute over lengre tid.
Styrke eigenberedskapen i befolkninga
Eigenberedskapen i befolkninga skal styrkjast år for år.
Ulstein kommune vil jobbe for:
- Vidareføre og vidareutvikle eigenberedskapsveka og lokal informasjon om beredskap.
- Samarbeide tett med frivillige aktørar om opplæring, informasjon og befolkningsretta tiltak.
- Sikre god krisekommunikasjon også ved bortfall av digitale kanalar.
Meir samhandling
Meir samhandling mellom kommune, frivillige, næringsliv og statlege aktørar.
Ulstein kommune vil jobbe for:
- Styrkje samarbeidet med omsorgsberedskapsgruppa (sanitet), Søryane Røde kors, sivilforsvaret og heimevernet om tenester og ressursar knytt til omsorg, evakuering og støttefunksjonar.
- I større grad involvere næringslivet som ein aktiv beredskapsressurs.
- Jobbe for å etablere eit felles beredskapsråd med nabokommunane for å styrkje samordning, samla kapasitet og samvirke på tvers av kommunar, næringsliv, frivillig sektor og statlege aktørar.
Geografiske informasjonssystem
GIS (Geografiske Informasjonssystem) skal vere ein integrert del av kommunens beredskapsarbeid.
Ulstein kommune vil jobbe for:
- At kriseleiinga har tilgang til GIS‑kompetanse ved behov, slik at geografiske analysar og situasjonskart kan nyttast aktivt under hendingar.
- Å sikre ei oppdatert geodatabase for beredskap, med rutinar for jamnleg oppdatering og tilgang til nødvendige kart også ved bortfall av ekom (inkludert papirkopiar).