Støttekontakten tilbyr mellom anna sosialt samvær og følge til ulike fritidsaktivitetar. Støttekontakten kan vere med deg å gå tur, gå på kafé, kino, trening eller andre sosiale aktivitetar. Fritidstilbodet skal vere basert på den enkelte brukar sine ønske, behov og forutsetningar. Praktiske gjeremål og transport er ikkje primære oppgåver for fritidskontakten. 

Føremålet med ein støttekontakt er at du som søkar skal få ei meiningsfylt fritid saman med andre.

Koordinator for kontaktordninga gir opplæring og oppfølging av støttekontaktane.
Støttekontaktane må skrive under på at dei har teieplikt. Teieplikta gjeld også etter at støttekontaktperioden er avslutta.

Barn og vaksne som har behov for hjelp, for eksempel på grunn av 

• fysisk eller psykisk sjukdom
• skade eller liding
• sosiale problem

kan ha rett på støttekontakt.

Tenesta er gratis, men utgifter til aktivitetar må du dekke sjølv.

Du kan søke om følgekort (ledsagerbevis), som gjer at støttekontakten din får gratis inngang på stader som godtek dette beviset. 

Kommunen har plikt til å behandle søknaden din så snart som mogleg. Dersom det ikkje vert avgjort innan 4 veker skal du ha skriftleg melding om dette, med opplysningar om når du kan vente at det vert gjort vedtak i saka.

Vi nyttar ressursorientert saksbehandling. Det vil seie at vi er opptekne av kva innbyggarar klarer sjølve, kva pårørande og anna nettverk kan hjelpe til med, og kva omsorgsetaten kan bidra med. Dette får vi til gjennom samarbeid og dialog med kvarandre, der målet er at innbyggarar med hjelpebehov, skal kunne leve eit mest mogleg sjølvstendig liv.

Vurdering

Vi kartlegg behovet ditt for tenester.

Saksbehandlar vil kontakte deg for å snakke med deg om søknaden og avtale eit heimebesøk dersom det vert vurdert som naudsynt.

Når det vert gjort vedtak i saka vil det gå fram om du har fått tildelt tenesta eller ikkje, og kva tenesta omfattar. Du vil også få ei grunngiving for vedtaket.

Dersom du ikkje er nøgd med vedtaket kan du klage til kommunen innan fire veker frå du fekk vedtaket. 

Forklar kva du er misfornøgd med og kvifor du meiner at vedtaket bør endrast. Kommunen pliktar då å ta ei ny vurdering.

Vert avgjerda ståande, vert saka sendt vidare til Statsforvaltaren. Dette får du melding om.

Send klaga di til

Ulstein kommune v/kommunalsjef helse og omsorg, postboks 143, 6067 Ulsteinvik.

Meld deg som støttekontakt her

Kva er støttekontakt?
Støttekontakten er ei teneste til personar i alle aldrar som har behov for følgje til ulike fritidsaktivitetar. Det kan vere på grunn av nedsett funksjonsevne, alder eller sosiale årsaker.

Kva gjer ein støttekontakt?
Ein støttekontakt skal hjelpe ein annan person til å ha ei aktiv og meiningsfylt fritid. Støttekontakten kan for eksempel kome på besøk heime, bli med på kafé, kino, idrettsarrangement eller andre sosiale aktivitetar. Kva de gjer er opp til den som treng hjelp eller besøk.

Krav til søkar
Du treng ingen spesiell fagleg bakgrunn, men du bør vere sosialt engasjert, finne glede i å hjelpe andre menneske og ha evne til å finne på aktivitetar. For å skape stabilitet for den som treng hjelp, bør du kunne binde deg over ein lengre periode.

Det er krav om politiattest og teiepliktskjema må fyllast ut.

Slik søkjer du om å jobbe som støttekontakt
Du sender inn ein open søknad, og i søknaden fortel du litt om deg sjølv og kva interesse/erfaring du har. Bruk søknadskjemaet over.

Kva skjer vidare?
Er det ikkje ledige stillingar som støttekontakt, legg vi søknaden din i ein søknadsbank. Vi tek kontakt med deg når vi har behov ein støttekontakt.

Lønn
Som støttekontakt får du timebetalt for å hjelpe ein anna menneske til å få eit meir sosialt og aktivt liv.