Ei tidsavgrensa rehabilitering der opptrening i daglege gjeremål skjer i eigen heim. Eit tverrfagleg team med ergoterapeut og fysioterapeut som samarbeider med sjukepleiar og gjer ei systematisk kartlegging av funksjonen din. I samarbeid med deg vert det utarbeidd mål som du synst er viktig å meistre i din kvardag. Teamet og heimebasert omsorg vil i lag med deg samarbeide mot dine mål. Innsatsen vil vere intensiv i starten og minke i takt med forbetring av dine funksjonar.

Treningsarenaen vil vere i din eigen heim. Saman med deg vil vi trene på det som er viktig for deg for å klare deg best mogleg i kvardagslivet. For å oppnå dette jobbar vi intensivt saman med deg i rehabiliteringsprosessen i ein avtalt tidsperiode. Evaluering av framgang og justering av mål skjer undervegs.

Du er motivert til å gjere ein innsats for å gjenvinne det du tidlegare meistra, slik at du i størst mogleg grad kan halde fram med å vere sjølvhjelpt i eigen heim.

• Du som søker om helse- og omsorgsteneste frå kommunen for første gong, eller dei som søkjer om meir teneste.
• Du som har vore innlagt i sjukehus (og sjukeheim, rehabiliterings-avdeling) og opplever behov for hjelp i kvardagen etter sjukdom/skade.
• Du som bur heime, men ikkje lenger har same funksjon som før og strevar med å meistre til dømes personleg stell, matlaging eller andre aktivitetar.
• Du som har noko hjelp i kvardagen, men kanskje har behov for meir hjelp.

Tenesta er gratis, men tiltak som vert iverksett kan innebere kostnadar.

Gå til søknadsskjema

Kommunen har plikt til å behandle søknaden din så snart som mogleg. Dersom det ikkje vert avgjort innan 4 veker skal du ha skriftleg melding om dette, med opplysningar om når du kan vente at det vert gjort vedtak i saka.

Vi nyttar ressursorientert saksbehandling. Det vil seie at vi er opptekne av kva innbyggarar klarer sjølve, kva pårørande og anna nettverk kan hjelpe til med, og kva omsorgsetaten kan bidra med. Dette får vi til gjennom samarbeid og dialog med kvarandre, der målet er at innbyggarar med hjelpebehov, skal kunne leve eit mest mogleg sjølvstendig liv.

Vurdering

Vi kartlegg behovet ditt for tenester.

Saksbehandlar vil kontakte deg for å snakke med deg om søknaden og avtale eit heimebesøk dersom det vert vurdert som naudsynt.

Når det vert gjort vedtak i saka vil det gå fram om du har fått tildelt tenesta eller ikkje, og kva tenesta omfattar. Du vil også få ei grunngiving for vedtaket.

Dersom du ikkje er nøgd med vedtaket kan du klage til kommunen innan tre veker frå du fekk vedtaket. 

Forklar kva du er misfornøgd med og kvifor du meiner at vedtaket bør endrast. Kommunen pliktar då å ta ei ny vurdering.

Vert avgjerda ståande, vert saka sendt vidare til Statsforvaltaren. Dette får du melding om.

Send klaga di til

Ulstein kommune v/kommunalsjef helse og omsorg, postboks 143, 6067 Ulsteinvik.