Eigedomsavdelinga sitt oppdrag er å planleggje og gjennomføre nødvendige tilpassingar av skulebygget og uteområde med sikte på oppstart av barnehage frå august 2027. 

Kommunestyret sine føringar og tidlegare fatta vedtak er viktige premissar for vårt arbeid framover. 

Prosjektet tek utgangspunkt i vedteken framtidig bruk av området. Eigedomsavdelinga sitt mandat er avgrensa til å tilpasse eigedomen til barnehageføremål innanfor gjeldande krav og rammer.

Orienteringa som nyleg vart gitt i teknisk utval, var ei første statusorientering om prosjektet. Arbeidet er framleis i ein tidleg fase, i overgangen mellom skissefase og forprosjekt, og fleire avklaringar står att knytt til funksjonar og behov for framtidig barnehagedrift. 

Dette er interne prosessar i organisasjonen. 

Utover dette har vi hatt tett dialog med barnehagane, både tilsette og foreldre, som skal inn i bygget neste år, og presentert prosjektet og kva vi veit til no i saka om drifta av ein ny barnehage. 

Vi ser føre oss at det vert fleire møte etterkvart med desse gruppene.

Kommunen har forståing for engasjementet og roser innsatsen ein har lagt ned i utvikling av skuleområdet. Målet til kommunen er at eksisterande uteområde og leikeapparat i størst mogleg grad skal vidareførast og nyttast vidare, så langt dette tilfredsstiller gjeldande krav til sikkerheit for barnehagedrift. 

Dersom noko ikkje kan vidareførast, må det vurderast gode løysingar for etterbruk. 

Utgangspunktet er at anlegga i størst mogleg grad skal vidareførast og framleis kome bygda til gode. Området vil vere ope og tilgjengeleg for bygda utanom barnehagen si opningstid, tilsvarande slik området vert nytta i dag.

Gymsalen med tilhøyrande kjøkken og toalett vil kunne nyttast av bygda utanom barnehagen si opningstid. Korleis dette praktisk skal organiserast kjem vi tilbake til.