Ulstein kommune har vedteke lokal forskrift om open brenning av avfall i småomnar. I denne står det mellom anna at følgjande open brenning skal likevel vere tillate:
- Open brenning på grillinnretningar, utepeisar og kaffibål.
- Brenning av reint trevirke, avispapir og liknande i vedomn.
- Bråtebrenning og brenning av tørt hageavfall (greiner, gras og lauv) utafor definerte forbodssoner så lenge det ikkje er til plage eller uroar naboar og andre person.
- Bålbrenning jonsokaftan etter klokka 12:00 på stader med liten fare for brannspreiing, og det ikkje er til plage eller uroar naboane. Det som vert brent skal vere reint trevirke og/eller organisk materiale. Grunneigar må ha gjeve løyve, og brannsjefen må ha fått melding.
Her kan du sjå kart som syner dei definerte forbodssoner.
Innmelding av jonsokbål
§ 6 punkt d. i «Lokal forskrift om open brenning og brenning av avfall i småomnar» er det gjeve amnesti med omsyn til bålforbodet i Ulstein kommune på jonsokaftan. Ulstein kommune v/teknisk etat har i mange år praktisert innmelding av større og mindre jonsokbål. Båla skal meldast inn skriftleg til postmottak@ulstein.kommune.no. Merk gjerne eposten med «Jonsokbål». I e-posten skal det minst vere informasjon om:
- Kvar det skal brennast, gjerne med gards- og bruksnummer og kart (sjå www.sunnmorskart.no)
- Informasjon om det er gitt løyve frå grunneigar
- Namn, e-postadresse og mobilnummer til bålansvarleg
Frist for innmelding av jonsokbål er den 20. juni. Det er ikkje nødvendig å melde inn små bål som skal brukast til grilling og koking av kaffi. Einaste er at grunneigar må ha gitt løyve til å brenne bål på privat grunn.