Kva betyr dette for deg som har nedgraven oljetank?

• Det er frå 1. januar 2020 ikkje lov å bruke fyringsolje og parafin til oppvarming, og oljetanken må derfor snarast mogleg takast ut av bruk.

• Når han er tatt ut av bruk må han tømast og dersom mogleg gravast opp og leverast inn til godkjent avfallsmottak. På den måten unngår ein framtidig lekkasje og forureining i grunnen. Ved å grave opp tanken kan du også finne og få fjerna eventuell forureining.

• Viss det er heilt uråd å fjerne tanken, kan han ligge. Men då må han etter tøming også reingjerast grundig og aller helst fyllast med sand eller grus. 

• Ta kontakt med kvalifisert føretak som utfører arbeidet for deg. 

• Ulstein kommune har per i dag ikkje ei lokal forskrift som omhandlar nedgravde oljetankar, og kan difor ikkje krevje at tankar under 3200 liter må gravast opp. Men den generelle plikta i forureiningslova § 7 til å unngå forureining er likevel gjeldande, og det er grunneigar som har ansvaret. Eventuelle forureiningar som skuldast lekkasje frå tanken kan verte særs kostbart, føre til luktproblem i bustadar og gje skade på miljøet og forureine eventuelle drikkevasskjelder. Difor er vårt klare råd at du fjernar tanken – dersom mogleg. 

Økonomisk støtte frå ENOVA

ENOVA  kan gje støtte til privatpersonar for fjerning av oljetanken dersom ein samtidig erstattar han med ei væske-til-vatn-varmepumpe, luft-til-vatn-varmepumpe, biokjel eller bioomn med vasskappe. Konvertering til fjernvarme vert også godkjent. Støtteordninga vert avvikla i 2020. 

Les meir om støtta frå ENOVA og korleis du sender elektronisk søknad

Forbodet

"Forbodet sender eit klart signal om at vi no skal over på fornybare oppvarmingsløysningar – fossil olje til oppvarming høyrer fortida til", seier klima- og energiminister Ola Elvestuen (V). 

Forbodet vil også omfatte driftsbygningar i landbruket frå 2025 og mellombelse bygningar frå 2020. Forbodet vart formelt vedteke av Klima- og miljødepartementet og Olje- og energidepartementet 29.06.2018. Du kan lese meir om forskrifta hos Klima- og miljødepartementet. 

Spørsmål?

Miljødirektoratet har laga ei nettside med svar på vanlege spørsmål om nedgravde oljetankar. Du kan også ta kontakt med Arild Støylen, sjå kontaktinformasjon nedst på sida.