Politisk struktur i Ulstein

Bakgrunn:
Ulstein kommune har hatt hovudutvalsmodellen som politisk struktur frå 1980.
Siste versjon av politisk struktur var vedteken i kommunestyret den 23.09.1999.

I 2002 vart det nedsett eit utval til å vurdere den politiske strukturen. Kommunestyret vedtok at Ulstein framleis skulle ha hovudutvalsmodellen og 25 representantar i kommunestyret. Utvalet sitt arbeidet vart avslutta der, og nærare evaluering vart dermed ei oppgåve for det nye kommunestyet.

Gruppa sitt mandat og samansetning:
Politisk leiargruppe bestemte i møte den 25.11.2005 at Ulstein kommune straks må starte ein prosess/utgreiing av politisk struktur.

Den 13.12.2005 gjorde Formannskapet vedtak i sak 05/0137 om å sette ned ei styringsgruppe og ei prosjektgruppe til å arbeide med evaluering av den politiske strukturen i Ulstein kommune:

1. Ulstein formannskap startar arbeidet med evaluering av politisk struktur i Ulstein.
2. Formannskapet er styringsgruppe for arbeidet med ordføraren som leiar.
3. Prosjektgruppe er formannskapet utvida med det partiet som ikkje er representert i formannskapet.
4. Styringsgruppa lagar eit arbeidsutkast med framlegg til mandat, der også tidspunkt for gjennomføring og iverksetjing er teke med. Dette framlegget blir lagt fram for kommunestyret innan 01. mars 2006.
5. Styringsgruppa peiker ut arbeidsgrupper etter behov.
6. Sekretær for arbeidet er politisk sekretariat.
7. Rådmannen si leiargruppe får orientering om arbeidet, og kan få rolle som referansegruppe.

Endeleg vedtak:
Saka vart lagt fram for formannskapet den 21.11.2006 og vart endeleg handsama i kommunestyret den 30.11.2006 med følgjande vedtak:

1. Ulstein kommunestyre vedtek at det skal vere 25 representantar i kommunestyret for valperioden 2007 – 2011.
2. Gjennomgåande representasjon er ønskjeleg, men vert å tilpasse praktisk i samråd med partigruppene/gruppeleiar.
3. Hovudutvalsmodellen vert vidareført som hovudstruktur, med ei tilpassing til endringane f.o.m. neste valperiode.
4. Teknisk utval vert vidareført som no f.o.m. neste valperiode.
5. HSO-utvalet vert slått saman med OPK-utvalet til eit nytt ”Levekårsutval” med 9 medlemmar f.o.m. neste valperiode.
6. Klientutvalet vert lagt ned. Oppgåvene vert overført til Levekårsutvalet.
7. Rådet for funksjonshemma vert slege saman med Eldrerådet for valperioden 2007 – 2011 ( jf. skriv) som ei prøveordning.
8. Administrasjonsutvalet og arbeidsmiljøutvalet vert slått saman f.o.m. neste valperiode.
9. Forhandlingsutvalet vert lagt ned, og oppgåvene vert delegert til rådmannen. Formannskapet skal framleis føre lønnsforhandlingane for rådmannen og hans leiargruppe f.o.m. neste valperiode.
10. Politisk sekretariat vert vidareført i samsvar i samsvar med kommunestyrevedtak i sak 05/0078 – pkt. 1.
11. Ulstein kommunestyre gir ordføraren mynde til å førebu saker og gjere vedtak etter fullmakt, jf. § 9 i KL f.o.m. 01.01.2007. Ordføraren sitt mynde vert fastsett i særskilt delegasjonsvedtak.
12. Ulstein kommunestyre ber det utvida Formannskapet (prosjektgruppa) å tilpasse vedtekne endringar i hefte ”Kommunal organisering – politisk struktur” sist justert 1999. Samstundes vert arbeide med ”Delegasjons reglementet” og reglement for ”Arbeidsvilkåra for folkevalde i Ulstein kommune” starta opp og lagt fram for kommunestyre juni 2007.
13. Evaluerast innan førebuingane til neste valperiode 2011.